奇怪的理論

唔知大家有冇聽過，英國人又或是曾經在英國生活的人頭髮會比一般人少和稀薄？朋友常常都奇怪曾在英國生活的我，為何頭髮仍是那麼多．．．．我真係俾佢依個理論考起，我唔覺係英國生活會少ｄ頭髮喎！朋友就立即舉例說明阿邊個同阿邊個都係咁，因為英國的水係hard water，所以會令到頭髮脫落，但是佢話因為我奇怪所以仲仍然有咁多頭髮，俾佢講到好似係我有正常的頭髮是一個大問題咁．．．．．．難道全英國的人都頭髮稀薄咩．．．．．傻架！

返工啦．．．．

放左幾日假，晚晚都係早上三四點先入睡，依家要早上六時多起床，真是超級唔習慣呀！返到公司仲係好似發緊夢遊哂雲咁，只有收利是的時候是清醒的．搭巴士返工時睡得死去活來，仲發哂夢咁呀，我諗冇咩人好似我咁，短睡都發夢．

年初三

每年的年初三，我們一家都會去馬場食餐飯順便收利是，因為阿媽的朋友都會出現，咁入馬場未發馬會財先有利是財．買馬對於我地來說是完全唔識，咩三穿八呀，同買咩ｑ呀．．．．對於我都係完全唔知係咩，所以每場我地都搵幾隻個名好聽的馬，買佢三幾十元，到開跑時就不停咁大叫是但一個號碼，叫到人家以為我地係大戶（即係賭得好大），往往跑完場馬我地都唔知跑出的是幾號，亦唔知自己有冇收穫，只是見到有一大堆馬一齊過終點，冇所謂啦，叫吓都好開心架．由於晚晚都好晚才睡，到尾個幾場阿gel已經坐著入睡了，由於年初四要開工，返屋企休息吓，真係老啦！！！

打保齡．．．

年初一晚飯後冇咩野好做，我地又唔識打麻雀又唔好賭錢，所以去左打保齡．好多年冇打啦，志在玩下同朋友開心吓．業餘的打到過百分都好勁啦，打出２６分的是我阿妹，正常分數啦，因為佢係冇咩點運動架．佢好攪笑架，當晚佢的主要目標係打ｄ波落坑．年尾結婚的佢仲話要減肥，應該都難唔到佢，反而唔知佢男朋友點減咋，因為佢男朋友個肚腩好似人家有左五個月咁呀！真係向高難度挑戰．．．．

糖朝

行花市前我們去左糖朝食糖水，依稀記得糖朝以前好出名，不知為何出名，可能只是因為多遊客去而出名啦．我們叫了湯圓同豆腐花，湯圓完全唔得，浸湯圓的糖水一ｄ都唔熱，湯圓都唔好食呀．係豆腐花比較好，真是幾滑．食完湯圓都幾失望架，豆腐花補回些分數，不致於冇下次嘛．不過記住桶豆腐花都幾多架，我地六個人食剛剛好！

街邊檔．．．

這檔街邊檔在中環九記對面，每逄午飯時間總坐滿在附近上班的人，仲要有人企在你身旁等位．我最鍾意這裡的凍奶茶和奶油脆脆，朋友說這裡的番茄麵都好好食．耐唔耐食吓都幾好架，不過冬天去比較好，因為夏天實在太熱，一邊食一邊流汗都幾辛苦．記住呀，公眾假期佢地唔開架．

新年行大運

年三十晚當然要去行下花市，應下節過年嘛．我們的目標地點是花墟，食過晚飯甜品，作最後的衝刺．最開心的就是在這天可以把車四處泊都不用擔心會抄牌，泊好車我們就人迫人咁向花墟進發．警察實施人流管制措施，即是明明入口就在眼前，但要我們行一個超級大運先入到去．花墟入面當然係非常之多人啦，見大家生意都應該不錯，今年人人都搵到錢，花少少錢開心一下都好吖．最唔開心的應該是賣桃花的商販，全部的桃花都已經開哂花，減價都冇人願意搬番屋企呀！商販今年想到把桃花剪開來賣，一小枝一小枝咁賣，每枝二三十元，很多年輕男女幫襯，總萛有番點渣拿．可能男女老少都想豬年行桃花運呀！咁好啦，祝大家都行番過豬年桃花運．．．．

恭喜發財

恭喜發財
花開富貴
身體健康
橫財就手
豬年行大運

誘鼠記．．．．

老豆唔知去邊搵左舊年糕番公司又忘記放入雪櫃，第二日返到公司，阿妹第一個發現舊年糕被咬了一邊，依單野好明顯係老鼠做既，年糕上有明顯老鼠刨出的痕跡，都幾大架！由於公司眾人都害怕老鼠，阿妹第一時間搵管理處．管理處的回復是幫我地放老鼠藥喎！可是放老鼠藥即是毒死佢啦，佢死唔緊要呀，最怕的是唔知佢死係邊，一陣佢死係ｄ不知名角落就麻煩啦，唔知點搵番出黎而且新年搵鼠屍咩．再想搵個老鼠籠捉佢，管理處話冇喎，咁即係叫我地借助外力啦！

朋友在滅虫公司做，叫我地千萬別移動那個年糕，由得佢放在原位，誘隻老鼠再黎食．如是者每日早上回到公司都見到有新的咬痕，一日一個，不個一日細過一日，應該是因為佢第一日係最肚餓的，之後每日的食量日都減少，依隻老鼠都萛勁，真係日日都有食神呀．第四日朋友俾左老鼠膠阿妹，叫我地把老鼠膠圍在年糕旁．第五日終於都把老鼠繩之以法，佢貼在老鼠膠上，由於各人當時都太驚慌，老鼠在老鼠膠上不停咁又叫又動，所以忘記左影底依隻纏繞了大家幾日的老鼠．我肯定老豆都好驚，但係佢一手把佢丟左出去外面的垃圾桶．勁呀！

年廿九．．．．

年廿九啦，新年氣氛漸濃，家裡的水仙亦已經開花了，由於今年的農曆新年在立春之後，天氣已經變得和暖，行花墟時看到大多的花都已經開花，唔知頂唔頂得到年初一．昨晚食飯時，朋友還說看到那些一盤盤的吉 ，怕到年初一那些吉會爛掉．我阿媽仲話，見到人地抬著的桃花，花已經開哂，仲以為人家想把桃花丟掉，據聞桃花已經開了第一次花，所以年初一再開的機會微喎！今年天氣咁，花商同做時裝的都幾慘．

限時完成

放工第一時間去買海鮮，諗住煑番餐俾阿gel食，費是出去俾人掠嘛。本想買支香檳，但上次飲醉酒事件令我不敢做次。要係放工買哂所有嘢仲要係阿gel放工返黎前準備好，真是有點難度呀!細個時總覺得情人節係好興奮的日子，現在感覺完全唔同，總是覺得非常商業,但是唔做唔理又好似好衰咁，可能週遭群眾的壓力太厲害啦。我今晚的餐單比較普通，有番茄海鮮湯，煎鵝肝，大蝦與帶子，甜品就新鮮士多啤梨啦！

煎鵝肝

小禮物

開心最重要

今日係情人節，亦是各位俾人掠銀包的日子．其實有冇情人都好，最緊要日日都開心渡過．有情人只不過是在情人節這天冇咁煩，其他每日都好煩架．所以沒有情人的朋友，記住不用失望與唔開心，其實你地自由自在呀！有情人的朋友就忍痛在今日被各商戶搶啦，應該內心都願意既．

洗白白

年終點都要沖一次涼呀．．．．．

晚上囇月光

下午囇太陽

Annual Dinner

星期五是公司的annual dinner，去到山長水遠的黃竹坑，對我住在新界偏遠地區的人來說，是非常之遠和非常之不方便．整晚只有六個餸和美點雙輝，點食得飽呀！仲要每碟餸都係由侍應分好每人一小碟放到我地面前，每碟食物的分量非常之小，冇可能食得飽，仲要每個餸之間要等好耐，令人完全感覺唔到食左野．我地懷疑club house俾小左食物我地，即係明明每圍一碟餸，但係佢只係有十八圍餸俾我地廿圍人食．所以大多數的人只好飲飲飲，最終我都飲到死左咁．同事拿定一個膠袋，我就上的士找阿gel解救．沿途係的士不停的嘔，好鬼辛苦呀．．．．以後都唔飲咁多呀！

情人節

又係時間各大商號趁住情人節掠我地銀包的時候，連donut都唔放過呀．．．．．．．

囍．．．

與朋友到中環soho的囍食午餐，有所謂的套餐，兩碟小小的菜加一碟冇咩味的炒麵，真是不太好食．現在中環的租金咁貴，唔知依間餐廳可唔可以生存？可能佢地主要是做鬼佬生意啦！

沒有雪的北京.....

本約了朋友在農曆新年後去北京滑雪，昨日報紙報導北京氣溫高達十六度，真是好誇張．看來什麼地方都不用去，連札幌雪節都唔夠雪，看來要搵另一個地方去啦！不如台灣吖，天氣好唔好都冇影響，因為去台灣主要都是去掃街，又或者曼谷，去食野同做spa............

好熱呀．．

現在只不過是二月頭，連農曆新年都未過，已經好似夏天啦．．．．睇新聞話昨日最高溫度的地方有廿八度呀！還記得小時候過農曆新年好凍架，仲要著綿襖，相信天氣只會越來越熱，遲下冬天都冇埋，可以慳番買冬天衫的錢．

和諧

跟佢已經分開了兩年多，佢在心中的位置已經由非常重要而變為朋友．分開初時，雙方心裡仍有氣，在電話傾談時仍不停的互相吵鬧．過了這些日子，傾電話時已變得非常和諧，可見大家心中的氣都已消了，出來見面更像好朋友一般，嘻嘻哈哈的，談談各自的生活．大家的身邊都有了另一個人，反而說話仲開放，說起當日的自己都覺得好白痴．驚訝當初分手時自己為何那麼執著，一早懂得放開當日咪唔需要咁辛苦，應該是當局者迷呀．．．．

大掃除

還有個多星期便是農曆新年， 家裡還是亂七八糟咁，有排我地執呀！阿gel每個星期都買好多雜誌，但是又唔捨得掉左佢，應該等佢唔係屋企時幫佢掉哂佢．．．．哈哈！我肯定掉左好耐佢都唔會發現呀！

仲諗緊

仲有十日都唔夠就係情人節，近來太多野忙，仲未有時間想想送咩好．．．．．．

大日子

妹妹會在年尾結婚，但是所以過程都會交由我處理，好多野攪呀！我想幫佢攪完成個project之後，我應該會對結婚有恐懼感，因為一個非常重大的挑戰就係我阿媽．佢係非常之麻，所有野都要佢同意，而且所有事都要跟她的意思行事，如果唔係就會整日對住我地黑面．．．．好鬼煩呀！攪到好似佢結婚咁，仲話要結婚當晚，佢的朋友一定要坐在佢附近．．．．．咁真係有點離譜，當人地男家的人死架咩．．．．．．．．．．．．激死我啦！肯定由依家到阿妹結婚個日都有排嘈呀！

煮飯仔

星期天都不大想出街，看到滿街都是人，你逼我我逼你咁，都是留在家中看看電視比較好，而且星期天是真正休息的一天，最好什麼都不做，只是坐在家輕輕鬆鬆看電視食下野，都已經是一個享受．
我們去街市買了羔蟹回來，由阿gel出手抄一個”阿gel抄蟹”．好好食架，最鍾意就係用黎抄蟹的蒜同蔥，真是完美的組合呀！

生日快樂

今日是你的生日，在此祝你生日快樂．我們曾經一起渡過很多個快樂溫暖的生日，現在想起還是開心的．曾經想過每年都會在這天跟你一起，可是．．．．．
很開心你留給我那麼多美好的回憶，還記得我們到過很多不同的國家過生日，很多有趣的經歷都是我們一起渡過的，希望每年在你生日的一天，你身邊都有一個愛你關心你的人照顧你．祝福你．．．．

結束營業

星期五與朋友食午餐，在中環的Refectory，坐下看餐牌時才發現餐廳因為業主加租太多而要結束營業結，這間餐廳的水準不錯，很多時都是我與朋友食午飯的地方，有生意都要結業，真是生意難做．近來看到好多相同的例子，業主見你有點生意，就死命的加租，好似吸血鬼咁，務求要食盡租戶為止．其實租戶做唔住，冇人交租個業主咪又係冇收入，都唔明佢地點諗．．．

大減價

近日行街留意到四處都是減價的店舖，行行行，但係又找不到有什麼好買．看到滿街的行人，個個都拿著一袋二袋的購物袋，真是有點身痕架！在去旅行時真的買了太多的東西，有很多還靜靜地躺在櫃子裡，可能因為天氣太凍，它們都不想出來走動一下．咁等天氣暖番，帶它們出去做下健身操先．

黎明蔗汁

中環食飯時，行經一間有幾十年歷史的涼茶舖，門外竟然有一副當年很流行的公仔廣告，係非常似黎明的廣告呀！唔知當年係咪已經有一個好似黎明的人出現，定係黎明這個樣其實是非常普通．．