結婚蛋糕

飯後在中環閒逛，竟被我們看到有間專幫人訂做結婚蛋糕的店舖，所有的結婚蛋糕看起來好漂亮，好像專為外國人而設的．我想在阿妹結婚時送一個俾佢，唔知貴唔貴呢．．．

遊戲

我地參加了一個投資遊戲，遊戲開始時每人有一定的金額可以投資在指定的基金，我地可以每月調整投放的金額和基金，比賽一年後結束，回報最高的幾位有獎．第一年的比賽我們嬴得相等於雙人東京遊的獎金，第二年只是得雙人三日兩夜的台灣遊．現在新一年的遊戲又開始了，今年我們的目標一定係歐遊的獎金，希望我們的運氣好啦！聽電視的專家話，今年的投資環境惡劣喎，咁我點決定投放資金在那裡呀．．．．．．

陽光

食飯時看見陽光普照，唔知今個星期六可唔可以去游水囇太陽？肥了很多的阿gel不停叫要做運動減肥，我地兩個每日都攞住個米芝連四處去，又真是離譜了點，遲吓又去台灣，都係去埋台灣先萛！

年齡測驗

這個Wii Sports有一個好玩的地方就是可以測試年齡，我要做幾個特定的動作，之後佢會基於我的反應，力度和平均力作出分析．第一次試時竟然有八十多歲，唔係呀！冇可能架！不死心地諗著再試會後生點，點知佢唔俾試，因為每天只可測一次．自此我地每日返到屋企都試，今日只有４４四歲，比昨日的３６歲老左呀．．．．．．．唔知有冇機會係１８歲．哈哈！

台灣

這幾日為了台灣之行做資料搜集，今次只會在台北留一晚，之後就會留在台中．從台北至台中是一個不短的距離，台灣的高速公路常常都有交通意外，都是搭火車比較安全．台灣新建的高鐵比子彈火車快，由於我們去的日子亦是台灣的假期，所以非常難買票．台中的朋友不停的話高鐵好麻煩又難訂票，叫我改搭台鐵，唔係呀，搭台鐵要成四個多小時，高鐵只不過是五十分鐘，我真係唔想浪費時間．死不甘心的我打電話去台灣訂火車票，哈哈．．．．．雖然難打，但係都俾我攪掂，到時去火車站俾錢拿票就可以．

泰菜

跟同事去灣仔石水渠街食泰菜，這間舖頭的位置有點神秘，因為我對灣仔的路唔熟，係咁跟住同事尾係九曲十三彎的街頭巷尾走．去到一條街市，轉入一間賣泰式雜貨店，仲要入到店舖的最入處就是食野的地方．看來真的有點似泰國當地的小食店，只有三張枱，可是就坐滿了泰國人和老外，難以相信老外都不介意係度逼呀！

主打是泰式湯粉，我就覺得味唔太夠濃，九龍城的同心比較好味．同事叫冬陰公湯，我試了一口，放了太多的椰奶又唔夠辣，粉絲沙律味道不錯，不過有點乾身，粉絲很快就吸哂ｄ汁．好的是價錢平，全是街坊價，食lunch都可以去試下．

夏．．．．．

氣溫２６－２７度，濕度亦下降了不少，看來夏天已經悄悄咁入侵了我們的生活了．即是又要大換季，把所有冬天的外套拿去乾洗放好，一定又要攪成個週末．

一家人．．．．．

其實在兩年前，阿妹已經生過一次大毒瘡在胸口附近，最後仲要入急証室呀！昨晚食飯時發現老豆都生了一個大毒瘡呀！今朝阿媽仲話要同佢睇醫生，因為佢痛到睡不到．阿gel仲笑我，佢話咁証明我地真係一家人喎！頂！唔需要咁去証明呀！不知是否因為我們食野的問題，定是遺傳的問題．．．

毒毒毒毒毒．．．．．

粒大毒暗瘡已平復不少，可是臉上還有非常大的疤痕，按下去還是實實的，好像有硬塊在入面．不理佢幾日但是硬塊好似唔願離去咁，俾阿媽”鵝”了一晚，仲要嚇我話我出癬，以後塊面都會有疤痕呀．嚇得我又要去睇醫生．今次係睇皮膚科，醫生話唔係癬，只不過要長少少的時間去腫，仲叫我不用擔心．可惜同大毒瘡講再見時痱滋又到訪啦，今次仲要打孖一齊黎．．．．點解唔放過我呀！

腰酸背痛

連日在家不停打機，攪到我同阿gel都腰酸背痛．．．．只不過打吓遊戲機，又唔係咩劇烈運動，真係唔認老都唔得．

好唔得閒．．．．

終於我地都買了，雖然還沒有出正版．但係我地買的是水貨加改機版，即係唔需要買幾百蚊一個game，每個game都係幾十蚊，費是買到唔好玩的game唔知做咩好．煮野食game好好玩呀，成家人都玩到癲哂呀！完來玩game係可以把人的內在個性表露無遺，玩雙打時大家都互不相讓，死左時就互相指責，阿gel有時都會因為玩唔到而黑面呀，相信bbj玩時都一定鬧到其他人死咁滯．相信”新屎坑三日香”，我地近排唔會點出街，終日都留在家玩機啦．．．．．哈哈！

纏繞．．．．

這幾天被粒大暗瘡不停地纏繞著，每個相識的朋友同事都問我發生左咩事，大家都以為係牙痛導致半邊面腫起來．當人知道係為了暗瘡後，大家都不停笑我，問我係咪勁打邊爐勁食熱氣野，仲話我真係太毒喎．．．．這粒暗瘡好煩呀，睇醫生時醫生都”嘩嘩聲”，仲要打消炎針呀同介口呀．．．

今日仲有源源不絕的燶流出，我見到都想死呀．．希望唔好留個印係塊面度啦．．．．

痴線．．．．．

放工經過已開了幾天的H&M，想不到還有那麼多人在門外排隊，人龍伸展到差不多中環中心．各人都抱著朝聖的心態，痴線架！有寶咩！

昨晚食飯時我老豆仲問咁多人排隊，係咪個個都好想著到成個”馬勒當拿”咁？佢講完後成枱人都大笑，佢以為”麥當娜”係”馬勒當拿”呀．．．．　老豆，你好勁呀！

暗瘡．．．．

次次大壓力出現時，總係有ｄ野跟尾．冇名腫毒又發啦．．．．計滿口痱滋同背部大瘡之後，今次生暗瘡呀．其實生暗瘡一點都不出奇，但係我今次生係塊面上呀．．大件事，點見人吖！星期日一起身真係嚇到傻左呀，半邊面好似被人打腫左咁，就只係區區一粒暗瘡攪到我要食消炎藥，仲要成家人都笑到我面黃，好瘀呀．．．

仲係波箱呀．．．．．

星期六都係攞左架車去俾人攪，唔知個師傅講咩，只知佢話換過波箱油先萛，不過要訂原廠波箱油要一個多星期喎，咁即係繼續等啦！我已經作左最壞打萛，最多揸到架車行唔到為止．．．希望仲有救啦．．．．

甜品．．．

近期同朋友出街食飯多，飯後的指定動作就係去糖水舖食糖水，晚晚都攪到好夜先返到屋企．一返到去都係沖涼就睡．依家發現我同阿gel的體重由再直線上升，好唔掂呀！要諗計攪一攪啦！我唔想兩個都要買過哂ｄ衫呀．．．．．

asiamiles......

死儲爛儲的asiamiles到年尾就到期，無論點都要用左佢，唔係浪費哂ｄ心機．asiamiles的熱線超級勁難打，打左成日都叫我下次再打過，真係難打過細個打去電台攞飛的熱線呀！放工前死唔信邪再打多次，終於都俾我打到啦．我都係諗住訂明年二月去北海道的機票啫，估唔到依家訂都只係後備咋，真係唔知其他的人幾時訂，咁有神心一早打去，低佢有位．整個訂位過程成半個鐘，難怪條熱線咁難打啦！我仲有northwest的積分，只係夠換去日本的機票，又係今年夠期，看來都要去一程東京，今次唔知萛唔萛執條襪帶累身家．．．如各位有miles到期，記住換呀！唔好蝕俾佢呀！

工作

這個星期工作壓力好大，每日放工後成個人好似散左咁，肩膀非常痛，應該要去做個ｓｐａ又或者去鬆吓骨．定係計劃吓下一個旅行？我咁鍾意旅行係因為旅行時真係可以放底哂所有工作上的事，我返到黎真係可以咩都唔記得哂，被同事笑我玩到個心飛走左．

波箱．．．．

我架車有問題呀，由N波轉D波時，整架車向前抽一抽，我知一定有點問題，但又唔知係咩事．老豆幫我攞去問過，係波箱有問題，要換過喎．．．．．唔係呀，要換咁大件事．．．要成萬三銀，傻架．．．．我買番黎都係三萬，攪一攪要萬三，即係成三分一架車的錢，唔整好過．我點都唔會俾，都唔知會唔會係車房扼我老豆．．．．．

H&M.........

每日放工一踏入中環地鐵站，鋪天蓋地的H&M廣告佈滿整個地鐵站，置身其中會發現四周都被Madonna包圍．這間在歐洲很出名的店舖會在今個星期六開張，我不停聽到朋友說要去掃貨，係另一間Zara喎！我暫時仲未有興趣，到時睇下啦！

日圓

嘩！carry trade的威力真的非常勁，由於日圓的息率偏低，好多人走去借日圓之後再投資其他地方，就萛只是去買美元債券已經賺到可觀的息差，其中大多走左去新興市場投資，即係南美又或是東歐和亞洲地區．這些資金四處走，令到各個國家的股市都大上大落，而依ｄ人就上下其手，係一個國家搵到可觀的利潤後又走去另外的國家再揾過，唯一令佢地風險大增的就是日圓滙價．近日滙價大升的日圓令到這些carry trade趕緊平倉，所以大多國家的股票市場，又或是金屬市場都下跌，究竟尺佢地幾時平完倉？日圓上升了咁多，我去日本旅行的話，洗費一定多好多啦．．．

看來我的投資組合又要從頭再黎過，考慮一下有咩可以做先．滙豐應否沽出．．．又或是現在是時候買呢．．．是否應在滙豐業績差時買．．．．還是會一浪低於一浪．．．到了我這些年紀，一定要作出理財的決定，如果唔係，將來的生活都幾難攪．尤其是現在科技昌明，醫療進步令到人的壽命長左咁多，真是要有長遠的打算．．．．

加價．．．

踏入新年後，去唔同的食肆都發現每間都不約而同地換了新的餐牌．美其名係換新裝，其實係加價呀．嘩，平均都加10%，點攪呀，樣樣野都貴左咁多，人工又唔見加咁多喎！樣樣都加價，肯定有通脹啦．錢放在銀行往往都追唔到通脹，咁即係迫我地出去大抄特抄啦！希望唔好成為新一化羊生羊太啦．．．．．．

利是

今年的利是好似比往年小，仲未開呀，唔知利是內有冇驚喜呢．．．．．

bbj的利是

gel的利是

很累的一個星期

這星期的工作量勁多，香港又或是全球的股市都經歷了如笨豬跳式的下跌，都幾精彩架，很多意氣風發的人都急得一團糟．成手貨的又不停咁四處問人究竟發生咩事，應唔應該沽好．股市又或是經濟永遠都係循環不息，由不景氣慢慢上升，永遠到最瘋狂時，全人都沉醉時下跌．有時這個循環會維持十多年，但是現在社會發達，科技拉近了地區性的距離，全球每一角落所發生的事都有直接的關係，經濟循環亦縮短了．花無百日紅，唔知遲些時候睇電視新聞，訪問那些羊生羊太時，佢地仲會否那麼樂觀？