東京鐵塔 – 我的母親父親

東京鐵塔是一套講父母親與兒子感情的戲，片中主要著重於母親與兒子的感情．我知道每次我看這些充滿親情的電影時，一定頂不住，眼淚不受控制地流．這套戲沒有一般電影的特別流淚位，成套片都是平淡的說出年月的飛逝，每人都為了生活的磨練與洗刷，漸漸被吞噬．看了這戲後，我反反覆覆的在想，當年我的任性，完全忘卻了父母的付出，答應了他們很多事情，但好像很多很多都只是答應了卻沒做，愈想愈慚愧．．．．．．．．

哭．．．．

哭是一件很累人的事．．．．．．

全家人的事

星期一便是妹妹結婚的日子，原來結婚真是一件好麻煩的事，太多瑣碎事要兼顧．明明是兩個人的事，攪到全家人都關事．請太多人其實都幾無謂，有ｄ人真是十年都唔見一次，都唔知請來做咩．最煩是要平衡各方的勢力，即是咩人要同咩人一起坐，而阿A原來同阿D唔啱，所以唔可以坐埋一齊，嘩．．．好鬼煩呀！

咁煩的嘢唔係個個玩得起，唔好攪我．．．．

被投訴

心情極度惡劣，做錯嘢我願意承擔，你媽完我我都全受啦，你仲要去老細度投訴我．．．．．




我頂．．．．．．．．．．．．．．．

脫離冷氣

已經不用再開冷氣睡覺了，感覺好舒暢呀．．．．

秋天氣爽

秋高氣爽當然好想去bbq啦，我們在雜誌見到novotel酒店有bbq自在餐介紹，好似又平又好食咁，無無聊聊便打去訂位啦，怎知阿小姐同我講，”唔好意思，最快都要十二月的廿四廿六號，又或是一月三號．．．．．”唔係呀，有冇咁誇呀，依家唔駛錢咩．．．．

激鬼氣，等我聽日搵人去起爐自己燒．．．．．．

好蠢好蠢好Q蠢

人家話三歲定八十，我相信民間咁講是有一定的道理．

我人生的第一個分數就是”０”．係老師在我的默書薄上大大的狼狼的寫了一個大”ｘ”，之後在分數欄上寫上”０”．在我還在念幼稚園時，整個人都似一”舊”飯的我要經歷人生的第一次默書，當時我只知默書的意思是老師不會告知字是怎樣寫，我要把默書的內容完整寫在默書薄上．
老師當時把默書的格式寫在黑板上，即是”ｘｘ”，跟住隔一格又”ｘｘ”，之後又再隔一格嗰種，都唔知攪咁多格式做咩．蠢蠢的我竟然照把老師在黑板所寫一樣，把所有”ｘｘ”完完本本抄在默書薄上，當時我還懷疑老師攪什麼，明明默書不可以告知我們怎樣寫嘛，老師為何那麼蠢寫給我們看，其實蠢嗰個是我．一串串的問號在我腦內浮現，可是笨到死的我還是死要把所有”ｘｘ”寫在默書薄上，真是唔明當年我個腦放左去邊．後果當然是被人笑啦，仲要被屋企人笑到今時今日．相信冇咩邊個小朋友是咁白痴．最慘的是每次掲開本默書薄，第一頁便是這個丟架的分數．

這個零分是我一生的陰影，亦表示了我是這麼的笨．難怪到今時今日我還是．．．．．

報紙頭條

今日生果日報的頭條是香港有百分之七十四的女士覺得老公唔夠’硬’．．．．．．

對不起．．．
我與同事見到這段新聞時已經覺得勁攪笑，怎知下一段新聞仲堅．．．．．．

”妻子要求玩特別難道高的性姿勢．．．．”

究竟為何現在的報紙可以咁攪笑，我與同事兩個看到後，不停研究那難道高的姿勢應該是怎樣，邊講邊笑，最後結果都係唔明白，據同事說還有很多攪笑的形容詞，聽聽都忍不住笑．

報導還很正經的說”色戒”招色勿亂試，講到色戒一定要睇咁喎，而大雄都話床戲都值回票價．．．
等我叫阿gel陪我睇先．．．．

蟹蟹蟹

哈哈，連續吃了兩日大閘蟹，之後再食多一日抄蟹，結果星期日什麼地方都去不到，我的活動範圍是客廳與廁所之間，都不知去了幾多次，最要命的是不停放屁，好似發射火箭咁呀！最後痾到得水咋，清過腸胃之後好似成個人都輕左不少．

不知會否食得多蟹令我變股市大閘蟹呢．．．．．．

跌跌跌

今日香港應該會大跌，不知一千點定八百點呢？
會否好似上次大跌之後又大升呢？
是否應該在低位吸納？
但什麼是低位喎．．．．

準備好未呀？

今日夜工時跟爸爸一起開車回家，他不停追問阿妹的婚禮準備成點，又提我各樣事情都要做得好好睇睇．他的問題一大堆，例如：
賓客在那裡泊車？
酒水是否足夠？
什麼時候有麻雀打？
可以開幾多枱麻雀？
有幾多枝XO？（仲有人飲XO？）
花車誰人負責？（兄弟會負責架啦）
要買煙仔給各賓客？（現在香港室內已經全面不准吸煙啦，老豆）
記得買生果在飯後俾人食．．（老豆，現在唔興架啦，而且酒店會攪啦！）
．．．．．．．．．．．．．

仲有太多太多，為何他們那麼緊張？但是似乎男家一點擔心都沒有．．．．是否他們過慮．

厚嘴唇．．．

今日搭電梯時看到一個嘴唇非常厚的男人，佢個嘴唇厚到好像黑人一樣，無聊的我不停在想，不知吻落一個厚嘴唇的人與吻落一個一般嘴唇的人有咩分別呢？吻的時候，會否被厚嘴唇完全埋沒？唔知各位有沒有相關的經驗呢？

Burton shop....

我們看中了滑雪鞋，可惜要在美國才可買到．當我不停在網上尋找時，竟發現在NY開了一間Burton Shop，所有款都齊全呀，比在滑雪場的Burton好很多，而且服務一流．一於叫朋友幫我買對返香港．．．．．

大出血

還有兩星期便是妹妹結婚的日子，被我阿媽不停催逼的我們，今日終於走了去買衫．嘩！我們真係超級大出血，又裙又衫又褲又西裝，買衫的錢絕對夠去一轉東京呀，好肉赤呀！點解阿媽一定要我地咁隆重，買依ｄ衫真係唔穿得幾多次．我阿媽對妹妹結婚的投入程度，完全係好似自己嫁多次咁，頂佢唔順．

廢話

整個星期的工作量超多，晚晚都好夜才收工，唔知仲有幾耐忙呢？近來差不多全民皆股，好似個個求其買都搵到錢咁，真是有一點驚．經濟和股市有起有落，而且經濟循環不息，股市怎會不停升喎？我們偉大的祖國同胞好似冇咩經歷過股災，真是害怕九七事件重現．身邊朋友個個都講股票，無論係巴士站，街市定在電梯，股票號碼滿天飛．好似有點恐怖，點好呢．．．．

休息

做了成個星期，又等到可以自然醒的星期六，可惜今朝一早阿gel就嘈之巴閉，攪到我想睡晚一點都不可以．起身後我忍不住同佢問佢：”點解你成個老人家咁一早就起身架？”

今日什麼地方都不用去，因為師傅上來裝廚櫃門，終於都做好，人家上來看時仲以為我們的廚櫃是沒有門，朋友仲奇怪地問：”你地唔驚ｄ塵走哂入去廚櫃內呀？”．我地唔係咁開放架，點都有門掩蓋一下，不過未攪掂咋．

我仲未找尾數架，睇吓佢整成點先．

叫糊

昨晚本來非常興奮，睡覺前見到美股升升升，本想昨晚已經可以食糊，點知起身見到美國倒跌，見財化水．．．．

布吉的第一晚

我都知我拖得太長，不過真係好忙呀．近來我發現耳後多了很多白頭髮，有冇攪錯呀，阿gel明明大我幾年架嘛，佢好得戚咁撥一下頭髮然後同我講：”我就冇啦．．．”　我頂，睇佢得戚幾耐．

又離題，講番布吉先．．．．．

我們好開心地在巴東街頭掃街，之後就開車返酒店．由於我們已經約了第二朝一早去玩ATV，而且當天又早機到布吉，所以便想早點睡覺．

返到酒店感覺好舒服，因為此酒店沒有很多香港人，大多住在這裡的都是老外，所以比較平靜．十時多我們已經上床準備睡覺．當晚．．．．我發了一個非常恐怖的惡夢．．．．

夢中的我與當時的我一樣是正在睡覺，而且阿gel亦都是睡在我左邊．可是那間房非常破落，非常陰森，非常凋零．不久開始有不同的人走過來把我按在床上，他們都面目猙獰，不停把我按住，當時夢中的我完全掙扎不到，想叫又叫不出，正在睡覺的阿gel話我已經不停的叫了十多分鐘，可是我仲仍然熟睡，拍我又唔醒．在夢中我就被不同的人按了十多分鐘，到最後，有一個超級面目猙獰的人走過來好大力好大力咁咬落我隻手上，咬到我非常非常痛，夢中的我非常驚，在又驚又痛的情況下我大叫．．”我隻手，我隻手，我隻手呀．．．．．”同一時間，現實中的我亦在叫，嚇得阿gel大力打醒我，我醒的時候發現我的睡覺姿勢與夢中是一樣的，而我隻被人咬的手都是放在身上，仲隱隱感覺到痛楚．當時我真係驚，但係又不敢同阿gel講發咩夢喎，只是說發惡夢．我立即叫阿gel開了所有的燈，仲要把電視開了．之後我又驚又唔敢再睡，可是我真是非常累，不停嘗試撐起眼，就在半夢半醒之間，我清楚聽到在我右邊耳有一把女聲講了一句說話，可是我又聽唔明佢講咩，唔知佢講咩話，嘩．．．．嗰一刻的我立時成個人醒左，完全坐起身，一點都不敢再睡在床上．我仲立即同阿gel講：”我要返香港，我要返屋企！”　我仲驚到整個人都不停在震，真是從未如此恐怖，我去那麼多次旅行都未試過有ｄ咁嘢嘛．阿gel見我面青口唇白，都不用多問，胡亂答我就萛．我即時記起我冇帶條玉頭錬呀，於是聲震震咁叫佢攞番俾我帶．

無論點我都覺得不能再留去那間房，於是打電話去要求換房．當值職員問我點解，我都不知怎答他，只有不停說我感覺不舒服，佢話即時車我去醫院，但是去醫院有咩用喎．但是佢又話冇我住緊的房，只可以暫時俾我住套房，等明日有房再幫我換．於是我們好似走難咁，咩都冇攞就即時離開，個職員好似仲驚過我地咁，電視都唔理即時護送我們離去．

去到另一套房後，不知是否套房太大，感覺仲陰森，我一點都不想留下來．於是問佢有沒有職員可以陪同我們一起，佢話職員要走來走去做嘢．於是我再問佢有冇職員休息室，佢竟然話冇喎！之後佢就提意我們跟佢去大堂，咁我唯有跟啦．我們到達大堂，佢仲沖杯熱茶俾我，阿gel話我面色好差，講嘢都口震震呀．．．．冇耐之後，橫風橫雨，仲要閃哂電，我們就這樣睡在大堂直到天光．．．．．．

直到現在，我都唔知當時我係發夢定係．．．．．．．．．．．．．．

好食

阿gel帶我去了Nobu食了一個完美的午餐，我們點了廚師精選，即是完全唔知會吃什麼，俾咩我地就要食咩．其實我有點怕，因為我實在有太多東西不吃，如果十味有八味我都唔喜歡吃那怎麼辦呢？這餐午餐就在我擔心中渡過，最後我發現我所有的擔心都是多餘，因為阿gel已經預早同人家說我有什麼不吃，真是難不倒阿廚師．侍應拿每碟菜出來時都會作出專業的介紹，我當然是正在發夢啦，所以到最後我只知非常好食，但又真是說不出吃了什麼．好白痴呀！

大雜工．．．．

我在搬屋時拍的，佢似唔似電器技工呀？其實佢的職位是大雜工，搬運，電器安裝佢一手包辦！