凍得滕滕震

市區氣溫十一度，我住的新界仲要低幾度，好q凍呀！真係唔明，在外國明明日日都得幾度又或是零下幾度，但感覺絕對冇香港咁凍，點解呢．．．．．

咁凍的日子，最好是在家沖杯熱茶在帔窩中睇電視．

藏王民宿的晚餐

玩完snowboard之後累到死，返去民宿食阿伯為我們而設的晚餐．由於肚餓的關係，咩嘢都覺得好食，我地仲要好驚唔夠飽，咩都俾我地掃清．

好清的湯

羊排的汁酸酸地又幾吸引架

藏王雪場上堂

其實我地只不過玩過幾次snowboard，對於所以技巧一點都唔熟，所以其中三個決定再上半日堂，學多一點唔想跌得咁金嘛．上堂都幾攪笑，阿sir用佢僅有的幾句英文同教我地，其實身體語言係非常重要，佢會先示範一下，再每人執一下我地的動作，完來唔太需要講架，咁仲有效，大約知道點轉動，好過講講講，口水多過茶吖．．．．．

阿sir

好快就天黑啦

又唔係咁凍

藏王橫倉的午餐

玩了一個早上snowboard的我們已經累得想死，行路慢到隻腳都提不起那樣，去到雪場的餐廳食午飯，我地四個一見到有櫈即刻一個屎忽坐落去，完全唔想起身呀！

大多雪場的餐廳食物質素都係一般，有些直程係難食添呀．但係估唔到這間叫橫倉的又唔錯喎，雖然食物的種類唔多，但係好食咪得囉．我地食食食仲要飲啤酒，最終飯後玩snowboard時不俐停嘔氣呀，幾難頂，以後玩snowboard都唔可以食咁飽呀！

好香口，送啤酒一流

藏王～滑雪去．．．

經過一晚的折騰，我們一早就去租板玩snowboard．．．．．

一早起來看到滿天滿地都是雪，感覺好high呀！而且空氣又清新，呼吸都大力d，唔係講笑，鼻屎都冇呀！哈哈．．．．．

民宿伯伯車我們去租板

三個靚女

我們房間外

米澤的波起登

傳說中的波起登是非常出名的米澤牛專門店，聽說以前的日本天皇都指定要食呀！而米澤牛是日本三大牛之一，在東京賣都已經好貴，仲要唔會出口喎！講到咁得，唔試唔得呀！我們臨時打電話去訂枱，阿gel用佢僅有嗰幾句日文竟然都攪掂，哈哈！

我地咁辛苦去到當然想叫最靚的米澤牛燒來食啦，頂，佢竟然話冇喎，因為全部都要預訂呀！有冇攪錯呀，我咁遠坐飛機黎架嘛．．．．．只有退而求其次啦！先來的是餐廳自製的黑椒腸，我就覺得冇咩特別．跟著是我喜歡的牛排，嘩！依個掂呀！牛排真係感覺溶入口中咁，一咬就滿口牛肉香，很快就被我掃哂．另外的牛肉鍋都超級正，阿靚女姐姐好細心咁放哂所有食物在鍋內，佢真係好似藝術品咁逐件放，我地香港人係冇耐性的，朋友總是覺得佢攪咁耐阻住我地食嘢呀！我尢其鍾意牛肉鍋內的燒汁，配飯食一流呀！下次再去一定一定要預訂最靚的牛肉呀！

大上大落

昨日戰意非常濃，在場內執了點貨，但是今朝第一時間走人．冇計，外圍太差啦．．．．死守唔係辦法！搵個機會再玩過！

Cloverfield

睇完這套戲之後，感覺超難頂．我地兩個都頭暈作嘔，太辛苦啦！死人鏡頭係咁搖，好似一定要搖到你死咁．仲要有好多人中途走人添！難怪套戲上之前一定要保持神秘啦，如果唔係那有人會睇呀！

我地就係咁俾佢欺騙左，各位如果你去睇的話．．．．．．．．記住話我知你有冇早走喎！

災民

我已經成為了股災區的災民．．．．．．．哈哈！今朝返工時同事們個樣都普遍黑哂，唔知今日又跌幾多百點，不過我仍相信有危即有機．．．．．


go go go!

美股

近來美股跌至四腳朝天，港股都唔好得去邊．我變為大閘蟹啦．．．．哈哈！好似仲係超級大閘蟹添！

香港已經下跌左咁多，係時候要想下今年應該買d咩，係地產勁定電訊好．．．．

腊鴨肶

我覺得普遍在九龍城街市賣的嘢係比較貴，但是去到就求其買點嘢啦！

今次我買腊味呀！屋企嗰d腊鴨肶食哂啦，要買定係屋企看門口，冇餸時隨時蒸一蒸就ok，方便又快捷．

九龍城樂園

九龍城街市樓上的樂園曾經是我週六一定和前度去食早餐的地方，食物好得，可惜現在不太就腳．和阿gel多次提起，終於在星期六帶佢去食了一個好味午餐．

我每次去到都唔太明白，明明唔係太多枱，但是阿老闆總是非常之忙．坐下之後不是即時可以叫嘢食架，係要等阿老闆得閒時才會啋你．今次我研究過之後知道點解佢咁忙，老闆每次只會做一樣嘢，唔會攞完嘢食立即幫人下單，所以拖慢哂．不過d嘢好食嘛，冇計啦，等吓都應該．我們最欣賞的是紅豆冰，紅豆大粒夠靚花奶又下得夠多，阿gel話好得呀！我就鍾意茶走同雪菜雞翼麵，講起我又想食啦．．．．．

平時應該冇咁多人

必飲紅豆冰

茶走
西多士（我地真是唔肥唔食架喎）淨雞翼掂

食在大內宿

非常肚餓的我們胡亂入了一間舖頭食嘢，我終於都親眼見到日本古時在屋內用的暖爐啦！我以往都只有在卡通片內才看到，我地個個都好開心呀，又係影唔停．

叫嘢食就係一個大難題，因為只有滿是字的menu，老闆是一對老年夫婦，完全唔識英文，所以我地都係求其點幾樣嘢就萛．其實我們叫的只係不同口味的蕎麥麵，可惜的是完全冇肉架，全素宴呀！最最重要的是好難食，我食左幾啖就放棄啦，好彩有人幫我掃哂．．．．

忙於唔知叫咩

佢地好衰呀