不認不認還需認．．．．

部中了毒的電腦是阿gel的，仲要是剛買不久的新電腦．我就是見佢新，又快而且容量又大，一心想搵成套Heroes慢慢睇架嘛，點知會中毒喎．由於還沒有清除得到所有病毒，係佢面前我盡量都唔提電腦，不停搵其他事充塞哂佢的時間．．．．．．希望佢得閒的時候我已經可以攪掂啦！

演唱會．．．

現在已經是六時多，還有兩個小時張學友演唱會就開始啦．．．．．．唔知今晚幾點完呢．．．

泰豊廔

阿媽話很久沒有食涮羊肉，於是我們一家就去尖沙咀的泰豊廔打邊爐．最喜歡泰豊廔的火鍋，因是用真正的炭爐，感覺很原始．而且每次去到泰豊廔，我們必叫的就是山東燒雞，燒雞附有一小碟醬油，醬油應該是泰豊廔自己調校，加入少少蒜頭，美味無比．我們從小已經常常去泰豊廔，價錢大眾化食物又有水準，最重要的是伙計全部做了幾十年，好有人情味架，阿叔成日話夠食架啦，唔好叫咁多啦．而且每次佢地一定送高力豆沙和'but'絲香蕉．．．勁抵呀！

電腦節．．．

星期日我們兩條友傻下傻下咁走了去灣仔會展的電腦節，一次都未去過的我仲以為有好多嘢睇，原來好似去黃金商場咁，又多人又要勁排隊，最慘係唔知點解有好多奇怪男生，佢地成身汗味，好ｑ嗅呀，酸"叔”味好難頂．仲有一個現象，現場有很多著得比較性感（可是完全沒有美態）的女郎在sale產品，佢地都被很多很多的電車男圍攻，個個電車男都拿起相機不停咁影影影，真是好想問有咩好影呀．．．．．．本來我們想買一部15"的LCDTV放在家，最後咩都冇買就走左．

Cafe O

今日午餐去了皇后大道中的Cafe O，價錢ok而且食物水準幾好喎，最啱現在要減肥的我．Turkey Salad入面的火雞又不會”鞋”口，仲有一塊非常好味的garlic bread，食完之後非常滿足．而且很喜歡在很忙的日子，坐在入面享受lunch時的片刻寧靜，睇書又得，發夢又得，幾好呀！

點好．．．．

電腦病毒仍舊係度，我已經跟足方法，一步一步去做，奈何病毒就好像厲鬼纏身，無論怎樣，那個symantec AntiVirus Nortification都係不停咁彈出來．病毒呀病毒，你想怎樣才可以離開我部電腦呀？我們在weekend時已經不停咁嘗試，我覺得病毒就好像爛鬼電影入面的喪屍咁，打來打去都唔死．弄得我回家都唔想開電腦，我怕遲點我會有電腦恐懼症，連行去書枱的勇氣都沒有．真是唔明白，點解呀？為何同一病毒，人地可以完全清除而我就唔可以．．．係咪因為我樣衰呀？？我認囉，唔好玩我吖．．．．

救救bbj

今晚返到屋企開電腦，大鑊．．．．．．la嘢．．．．．　而且我們攪了成晚，個死人病毒點都整唔走，有冇人救到我呀？個symantec AntiVirus Nortification不停咁彈出來，點攪呀？佢話我中左Infostealer.Gampass和W32.Stration.CX@mm...........睇ｄ名都唔知係咩，clean又唔俾，delete又唔俾，妖．．．激死我啦．．．．．

戶外

阿妹要拍婚紗照，除了去那些什麼攝影公司之外，還叫朋友幫她影戶外的婚紗照．所以我們一行人就在星期日去了香港不同地方看拍照的地點，西貢白石，石澳，山頂和香港大學，我們只是開車去看看都已經大汗搭細汗，不知她拍照那天會熬成怎樣，一個穿婚紗一個穿禮服，仲要化哂妝咁，諗起都辛苦．我想她的心情應該是興奮的，如果我阿媽冇咁煩的話．．．．．

阿媽．．．

依個係我阿媽．．．．．我阿妹結婚已經成為佢的大事，每樣關於婚禮的事佢都一定有意見，仲每日都提我地唔可以失禮佢，真是很想同佢講，面子唔係一切，現在是阿妹結婚，最重要是她們開心，如果她每件事都順妳意而唔開心咁點呀，結婚是人生大事，當然是為自己而不是為別人啦！

阿爸睇完阿媽試穿這條裙時，好攪笑咁問阿媽：

”嘩！點解妳著到成個狄娜咁架？”

試婚紗

陪阿妹去試婚紗，原來係非常浪費時間，sales姐姐又話依樣唔得又話嗰樣唔包，好鬼煩．由於阿妹比較矮，所以好多婚紗都著得唔好睇．佢一心想著要穿一條好清咩都冇的婚紗，可惜肥矮的她無論怎樣都穿得不好看．原來穿婚紗都有心得喎，又要遮住依舊肉但遮得住依舊又遮唔住嗰舊，麵幾煩惱．哈，好在我不需要煩咋．

滿月啦

話咁快小朋友就滿月啦！好似好樣左，佢阿媽話放產假放到十月，真羨慕呀！只係羨慕佢可以放咁耐假．．．．好怕見到小朋友長大，因為佢地大個左表示我老左好多呀．．．．

做咩呀．．．

攪了成晚都post唔到相，做咩呀？係我的問題定係blogger的問題．．．

好臭呀．．．．

上星期日由於太累，難得一天在家，於是去了街市買餸回家煮飯食．在街市見到新鮮生猛的鮮蝦，被跳吓跳吓的蝦吸引，於是買了回家放在車上，邊回家邊想怎樣對付它們．

四日後，當我們興緻勃勃地想開車想出街時，一上車，嘩！好Q臭呀！嗰種臭係好似鹹魚同臭腳味，仲要係好臭的臭腳味，臭到想死呀！第一時間打電話俾老豆，問佢做咩放ｄ鹹魚係我架車上，但是佢不停話冇，仲問番我係咪放了一對波鞋係度，因為成車都是臭鞋味喎！冇人認之下，於是我同阿gel在車上不停搜索，由於已經天黑，好多暗角位真是看不清，唯有攞相機用閃光燈影底．司機位下面，靜靜地見它躺在地上，發出陣陣劇臭．其實真是幾恐佈，現在天氣那麼熱，冇虫已經好好．阿gel極速移走該條屍骸．但是臭味已深入了整架車，我們不停開窗吹，好似幫助不大，現在仲臭緊，唔知幾時散得哂．

虛脫的一天

每日都下趺的股市，嚇到所有人顛哂．散戶不問理由全沽．．．最多趺一千二百多點，很多人都打靶收場，怎料在下午有戲劇性的舉動，由下跌千多點，反彈一千點，真是心血少點都唔掂．眼見身邊的同事很多都面黑黑，食lunch搭電梯時，大家你眼望我眼，個個都好似輸到傻咁，哈哈，收市時只是趺了二百多點，奇蹟地他們的笑容又返番來了．

今日的上上落落，做到人都顛呀！

趺趺趺

香港今日已經趺破二萬一千五，看來仲有下趺空間．現在的我，什麼都不做，相信美國的sub-prime影響不到我手上的存貨．不知經濟會否走下波．．美國的樓價若果繼續下跌，咁美國的經濟都不會好，美國是世界大佬，即是中國點都會有點頭暈身’慶’．．．．．


好，坐定定睇戲啦！

八號風下的一天

星期五的八號波，與我們所想的放假有太大分別．下午二時三十分掛八號，我要直到三時十五分才可離開．阿gel的公司在金鐘，佢話金鐘的地鐵實施人潮管制，所以佢行過中環找我．可惜最後一通電話佢話係中環站等，而我就話去搭天星過九龍，之後我們就失散於混亂的中環之中．電話打極唔通，就萛SMS都冇反應，我就去左天星，發現最後一斑船在下午四時開出，但那時已經是三時五十一分，佢又怎趕過來喎，於是我就走回地鐵，人潮四面八方咁塞在地鐵內，我就好似一粒豆咁，這邊塞吓那邊跳吓，聽到身邊的人群不停投訴話已經塞了成個小時，而我就好幸運咁塞了十分鐘就上到地鐵．同阿gel在佢搵我而我又找佢時，我已經到了尖沙咀了．正準備走去火車站，阿gel的電話到，佢話我做咩唔等佢，佢週圍走去找我，仲在天星等左我好耐呀．．我已經不停SMS佢話佢知我去邊，點知佢收唔到喎！最終我在火車站等佢，我們要六時才回到家，足足用了三個小時才從中環返到大埔，仲辛苦過返工．

終於都八號

今日happy friday先掛八號，攪到我地要做哂所有嘢先走得，頂！今晚仲話要去飲．．．．

屎坑gel．．．

屎坑gel上次趺左部電話落屎坑後，佢被我話同被我笑左一晚．那晚回家後，我們小心翼翼地把電話拆開，把所有位置記下，用風筒好小心咁慢慢吹，由上至下左至右，反反覆覆咁吹了十多分鐘，仲要每一件零件都要接受風筒的洗禮，再把零件歸位．我們兩個仲要一起開部電話，睇吓救唔救得番．．．．．．．．

屎坑gel部電話竟然俾我地起死回生，不過用了兩日之後毛病開始來了．首先畫面的光暗度無論怎樣調教都係暗了下來，還有的就是menu抽吓抽吓咁，本來好容易就可以scroll下來，但現在只可逐個function慢慢落．我地自知這部電話命不久已，我叫阿gel好快點攞部電話去trade in．換左啦，仲值一千蚊，我地不動聲色的話要最新的P1i，哈哈，佢完全沒有發生我地部電話浸過水，我都覺得自己有點衰，而且又驚被人發現喎，扮哂嘢咁．開開心心咁攞住部新電話返屋企．

記住如果萬一趺左部電話落水，唔好開機，用風筒吹乾，風不能太熱，開機，如果冇事，最好trade左佢．哈哈！

這部新機幾好用，攪到我都想要一部

打風．．．

現在公司的同事正熱烈地評論明天會否掛八號波，大家一齊休息唔需要返工．總是覺得因為天氣而不用上班是借來的假期，原意是叫我們留在家不要外出，因為橫風橫雨危險，但每次八號波我們都總是約定朋友去睇戲或是唱吓歌咁，好興奮．．．．

今次嗰風好似好近，橙色嗰點係香港，颱風路線圖表示明早最接近香港，今晚睡前我要用念力push個風勁ｄ．

八號波．八號波．八號波．八號波．八號波．八號波．八號波．

沙巴酒店的午餐

由於全日都hea在酒店，好自然午餐都在酒店內攪掂．唔知點解馬來西亞人那麼喜歡bbq，我們看見印度藉的廚師在戶外燒烤，而且材料又不錯，囇到紅哂的我們立即走入去涼冷氣享受一下．

絕對不是浪得虛名的虎蝦，超級勁大隻，仲要有三隻咁多，在香港的餐廳只是食兩隻都要二三百蚊呀．材料新鮮，廚師又燒得剛剛好，仍然很嫩滑仲幾彈牙，十個好呀！牛排都燒得好，係五成熟就真是五成，唔會好似香港咁叫五成俾全熟，叫全熟就俾塊好似膠咁難食的牛排我．

燒雞奕 我鍾意食．．．．

唔記得講上次去沙巴，最好食的就係燒雞奕．雞奕燒得外面有點點焦，有點甜蜜的蜜汁包著嫩滑的雞肉，唔係講笑，真係可以食唔停口架．．．最重要是好平呀，六隻雞奕都係十蚊港幣咋！去沙巴記住食呀！

鬆一鬆

昨晚放工後去了massage，師傅是泰國人，她租了一個單位專幫人做spa．其實我成個人的肌肉都硬哂，在完全放鬆的環境，感覺上有點似在泰國做spa架，又靜又舒服，全程兩個小時我就睡足個多小時．．．．．唔知係太舒服定係太累呢．．．阿泰姐話那些按摩油是有減肥作用，叫我返屋企先再沖涼喎！收費唔太貴，百五蚊一個鐘，好過搵大集團吖．我已經決定一星期去一次～鬆骨．

晚上七時

今日是近這一個月最早可以放工的一天，做到成個人的肌肉硬哂，放工後要去搵阿泰姐整番兩個鐘massage先．我知香港近月來有難得一見的藍天與白雲，可是忙到抽筋的我想有足夠時間睡覺都唔得，莫講話有戶外活動．我決定今個星期所有屋企裝修的事務拋俾阿gel理，仲要叫師傅唔好搵我，公司的事可以等就等啦．．．我真是頂唔順啦！私人時間都冇，成個月冇上網，自覺好似返左鄉下咁！

我要自由！我要自由！我要自由！我要自由！