溏心

今晚已經係尾二的一集，昨晚歡仔終於都鼓起勇氣面對細契，當眾講出大契的好．勁呀！阿gel睇到大叫’做得好’，看來真是全家人都中哂毒．唔知大結局之後，香港人會否好失落呢？

換車牌

食lunch時去運輸署換番個十年的車牌同幫架車換行車証，十年車牌要九百蚊，行車証牌費要成差不多六千蚊．好貴呀，加埋七千蚊呀，夠我飛轉日本啦！賺錢．．．我要賺多ｄ錢！

熱到溶．．．．

今朝返工，由家裡去巴士站的五分鐘路程，汗如雨下，成頭都係汗，好似剛剛從水中出來一樣．朝早七點都叫冇咁熱吖，下午個人咪會溶．．．．途中經過整遍藍的大海，好想今日可以放假去海灘hea呀！

一於今個星期六黎番個下水禮先！

行雷閃電

昨日兩度發出黃雨警告，行雷閃電橫風橫雨．由於家裡電腦壞了，同阿gel一起搬部腦去整．去到見到好多人的電腦都壞了，隔離嗰個靚仔仲誇張，佢話屋企俾雷打中，行雷時成部腦燒左，仲要有燒焦的味道發出，成個電腦連個monitor都死左．嘩！勁誇張，我即刻問佢係咪住村屋，但是都應該有避雷針架，點會咁架．如果當時有人沖緊涼，咪會觸電而死．個靚仔的阿媽立即問番我地”要避雷針咩？我老公又話唔駛．避雷針有咩用架？係咪架？”　

聽完佢講，我真係好想回應佢”有咩用，等你唔好俾雷劈呀！”

我是電視迷

你是半個電視廣告迷﹗

你有69分，看來某程度上你是半個電視廣告迷吧！ 你喜歡看電視之餘，也有留心電視節目之間所播放的廣告。得到這樣的分數，也許只是有些不太突出的廣告你沒有留意。沒關係的，這不是你的錯，是廣告商拍攝得不夠吸引罷了！：） 老餅廣告測試

睇了演唱會

為溏心瘋狂

昨晚和親戚食飯，話題當然離不開近日的全城熱話－溏心風暴．我個表姐瘋狂到每晚在家睇完之後，第日返工仲要在公司bt番昨晚嗰集在lunch時睇．佢話因為太好睇，一定要睇多次喎！痴線架！我地屋企的阿gel，完全著迷，每一集都不能錯過呀！

又係溏心風暴

嘩．．．好衰呀！細契連自己個仔都利用．．．．．．．．．．．．．．．．賤格！

意外

今日睇報紙，見到有人在家中洗澡後不慎跣腳滑倒而死亡．睇完報導後，有種強烈的感覺，人生在世，太多嘢都不由得自己控制，真是要認真享受每一天．今日唔知明日事，看見一些人慳到不得了，只識把錢儲起，完全不會消費．如果有一天真是有咩事，咁咪咩都冇享受過．要對屋企人好，對身邊的人好更要對自己好，開開心心咁享受．．．．．

放鬆一下

星期六本來要同阿媽返大陸拜山，昨日佢打電話同我講取消．哈哈，突然我地就決定今晚放工飛去曼谷鬆一鬆．近來工作同裝修都攪到我地好緊張，已經訂了spa，希望可以令我們由頭至腳都完全放鬆，星期一返工再搏剎．

貪小便宜

我阿媽係一個非常之貪小便宜的師拉，仲係成日覺得自己好醒目，俾人讚佢兩句就飄飄然，再俾人呃左但係都覺得自己執到好野的人．佢想買一個普通的玻璃瓶，竟然因為隔離個阿婆的老人證有九折，叫人地老人家同佢去買．為了慳十元八塊，如果阿婆整親咁點吖．有時真係好唔明佢架．

開車回家

這是我開車回家時影架，一邊開車一邊發夢，原來每日可以早點放工，見到的天空是咁靚架！最好可以日日都見到啦，即係日日都早放工．

龍舟

星期六我地又去左西貢hea，見到龍舟呀！又係喎，就快食五月糉，當然有龍舟啦，現在練集都差不多，記得以前貪高興有玩過，不過超級辛苦架，玩到身水身汗，不過見到個海整個人就好舒服．不過現在再叫我去玩，咪攪．

藍天

香港難得一見的藍天，終於在今個星期六日出現．都係唔知點解，香港的天比起美國的天總是沒有那麼藍．

祖母

祖母陪我地睇電視時睡著了，見佢假牙郁吓郁吓咁，叫佢入房睡又唔肯，好似細路仔咁！

miss左

今晚去左打波冇睇溏心．．．．唔知youtube咁快有冇呢．．．

十一月

仲有五個月就是阿妹結婚的日子，平時玩開的朋友個個都話要減肥，包括結婚嗰兩個．我同阿gel各自望住自己個肚腩，唔係呀．．．．得五個月點攪呀！我提意不如大家一齊曾肥啦，咁仲特別，個個結婚都減到枝竹咁，如果我地一班肥仔肥女仲型啦．．．．．．

散左

打完波返黎，今日俾阿gel左剎又剎，剎到我腳都軟．今日happy friday，聽日又可以睡到自然醒，真是人生一大享受呀！又可以hea兩日．．．睇黎冇得點hea，又要出去睇裝修同廚房之類的嘢，格多ｄ價喎！

做嘢啫

做多小小嘢唔洗死呀，分得咁清，又唔見人地幫妳時妳會講多謝，有ｄ人的性格真係．．．自私！

借錢

老豆的妹亦即是我姑姐年紀都不小，她的子女都已經廿多歲，但是佢全家除左個老豆之外都有點問題．她成日覺得自己個老公冇用，搵唔到錢俾佢享福同冇錢俾啲仔女去外國讀書．唔知係咪因為佢一嘈夜嘈，她的子女漸漸都覺得個老豆冇用，她個大仔都已經廿六歲，但從沒正經做野，成日都覺得自己好得，只不過係屋企冇錢俾佢去外國讀書，佢覺得有錢去到美國就一定得，一定可以搵到好多錢．條友真係痴線，以佢咁的讀書態度，去邊都讀唔到啦．同佢講咩佢都實話美國人又點點點，中國人又幾咁唔掂．佢老豆千方百計左扥右扥叫人請佢個仔去西班牙做野，但係條友做唔夠幾個月又返黎，仲話好辛苦又受氣．我地一早已經預計佢頂唔住，但是都冇諗過咁快就返黎，返黎又唔搵野做日日留係屋企上吓網咁，都唔知佢想點．佢仲同我地講要搵份好d的工先做喎，我真係忍唔住話佢，有咩工唔辛苦唔需要受氣的記住單聲，我地個個都想做喎！

佢咁的勢，即係仲有排係屋企坐啦．佢阿媽就以個細女嫁到個有錢人為目標，本來搵到個都叫有錢的，仲未婚生女，本來姑姐威到盡，買咩都話非要名牌不可，誇張到個孫的每樣用品都要去日本買，仲要飛去日本買奶粉，佢話香港的奶粉唔好喎！可是她的有錢未來女婿突然話唔結婚，仲要唔再同佢個女一齊．自此後姑姐就不停問親戚借錢延續她的有錢夢．依家終於都問到我老豆借幾萬蚊，我地一家當然唔想借啦，但是真係唔知老豆會否暗暗借俾佢．．．．．

買邊個好...

搬屋連帶所有家電都要換，因為現有的要留俾阿妹，現在正頭痛買咩牌子好．電視，洗衣機，雪柜，冷氣．．．．有太多選擇好煩，又要不停四處打聽那一個牌子比較耐用．嘩！唔知以前老豆點攪咁多煩野，當年佢地仲要照顧我同阿妹兩條麻煩友．

溏心風暴

昨晚的溏心風暴非常精彩，大契出招．．．今晚早點返屋企睇先！

精神緊張

一有時間我就玩吓部Wii，近來比較忙，一有小小時間，例如等沖涼的時間就會急急開機做番個小手術－Trauma Center: Second Opinion．其實所有手術都幾白痴架，不過要在限時把手術完成而且那些音樂又令我非常緊張，通常玩完真係好似醫生做完一個大手術咁非常之累．不過我覺得好有挑戰性同成功感，可惜阿gel唔俾我玩，佢話那些音樂實在令人太緊張，我仲玩到發惡夢．夢中我隻手滿布被割開的疤痕，仲有肉芽從每條傷口生出，那些肉芽不停咁生，越生越長，嚇到我唔知點好，在夢中我都感到隻手非常之痛，奇怪的事情發生，那些肉芽慢慢生到變一塊塊的紅腸，仲由我隻手脫下來．睡夢中的我大叫，叫到要阿gel拍醒我問我咩事．自此，佢就唔俾我再玩這個game.

西貢hea一hea

星期日起身睇完有線電視的一粒鐘真人蘇，節目介紹西貢的一些好食的餐廳，攪到我想即刻去食．當阿gel開車到西貢時，我地發現四周都係車，假日到西貢的遊人真不少，好在沒有自由行，大都是星期天出外走走的香港人．泊好車向我們心想的餐廳進發，搵來搵去都唔知係邊，所有的屋都唔跟號碼，在１７９５號旁竟然是２９１號，咁即係點呀！我地行到成身汗，打電話去餐廳問位置時，佢問我地有沒有訂位，如果沒有的話就不用去，因為最早都要晚上九點九先有位．．唔係呀，我地專程開車黎架．．．於是我們就求其食點野就萛，有一點點掃興．

當我們漫步到碼頭時，發現佈滿賣海鮮的小艇，我們即刻睇下有咩好買，星期天可以在家煮海鮮餐嘛．我們的收穫是鮑魚和青斑，可惜我老豆吃時話條魚只是養魚不是海魚喎！下星期天係母親節，阿媽叫我地買海鮮返屋企煮俾佢食，好過出街食又貴又多人，佢唔想同人迫喎！咁我地去西貢買好定係去屋企附近的街市買好．．．．

心情壞透

為了裝修同阿gel鬧左好多次交，好煩呀！公司又多野做，好辛苦呀．．．．．