氣氛．．．

放工後發現四處都是聖誕的歡樂氣氛，成街人頭湧湧，商場已經播放充滿聖誕氣氛的音樂．攪到我好少出現的購物慾都想出來，要開始為聖誕禮物而煩惱．．
停泊於海港城的木製仿古帆船瑞典帆船哥德堡號

天勺

今日同朋友去銅鑼灣食日本菜－天勺，一間由日本人開的餐廳，餐廳不是很大，卻坐滿了人，朋友說一定要早一天訂位，如果一早打去訂當天lunch的位，一定訂唔到呀！一個lunch set都要差不多一百元，不過真是一分錢一分貨，品質很高．魚生好味，燒牛生熟程度完全係我所要求，我最怕太熟的燒牛，會好”鞋”，燒銀雪魚水準之上，不能錯過的是吞拿魚腩飯，真係非常一流，勁好味，吞拿魚腩撈飯再落少少醬油，食完個種滿足感真係形容唔到．阿gel食到讚不絕口，我地每個人都滿足離去．

超好食的吞拿魚腩飯

嚇死人....

剛剛才想股市在萬九點上，如火箭般標升了幾千點，差不多人人都賺錢，是否應該做點什麼之際，昨日就已經下跌了五百多點．今次下跌又唔多見各界人士震驚喎！好似普遍輿論都係話應該趁調整係低位再入過．．．．．想下想下．．．．由於下月去旅行成大半個月，而且又就快考試，都係唔好理，由得佢，升跌都冇所謂，專心預備我的考試仲好．這幾天忙著溫書，都冇時間去搵旅行的資料，到時去到唔知有咩好食．．．

德國啤酒節

每年的十月底，在尖沙咀的香港馬哥孛羅酒店都會擧行德國啤酒節，很多老外與外國公司都會參與．我被朋友拉去玩，放工去到現場不是太多人，當我們吹水一陣後，發覺全場滿座，竟然還企滿了人，人頭湧湧呀！入場費包了一杯大德國啤，在happy hour內買啤酒仲買一送一，我們當然唔執輸，先去買一送一再飲佢送個杯啦！就係因為咁，我飲到醉醺醺手震震咁，相都影到不知所謂．現場仲有德國豬手同德國腸供應，當然要另外俾錢買啦！

開始多人的現場

唱緊德文歌即係唔知佢唱咩

food stall

飲到癲

又是甜品

聽聞這間在九龍城店舖售賣的糕餅是新鮮專人在店舖內製造的，而且主理人堅持用最好的材料，一絲不苟的用心製造出每個如精品一般的糕餅，還有每日鮮製的麵包．店舖裝修精美，一件件糕餅如首飾般放在一個飾櫃內，真是有點像選購首飾那樣．我們選購了六件糕餅，包裝非常漂亮，感覺上似去shopping多過去買甜品．店主還怕糕點在車程中弄翻，細心的用膠紙把糕點黏在盒中．由於回家已晚，我們不敢吃太多，只是試了Chocolate Moouse，口感一流，唔太甜，非常好食，現在想起還是好回味．有機會可以去睇下，唔買睇下都開心．

chestnet hill

tiramisu

這個就是賣相好正而且好好味的Chocolate Moouse

orange moouse

mango cake

newyork cheese cake

像精品一般的糕餅

鞋盒一樣的包裝

店舖外觀

Wii

由於美國已經出了Wii，係網上見到好多相同短片關於依個遊戲機，睇到我心癢癢咁．個個人都玩到手舞足蹈咁，真係好吸引呀！但是我見到報導話美國有人不停玩了整晚Wii，個連住”手製”條繩斷左，成個”手製”飛向６０吋大電視．．電視即時瓜柴！睇完依篇報導後，即時有點點汗顏，我望向屋企部４２吋LCD，再望向阿gel，感覺上佢啤住我同想話我知”wii呀！wii呀！睇下你連部電視都整爛埋就知死！”．我即刻唔敢再係佢面前提起任何有關遊戲機的話題，希望淡化一下，等佢唔記得！哈哈！

我部腦...

屋企部電腦上唔到網．．．張lan卡成日都話我冇singal，我check過好多次，明明冇事架！打電話去賤信盈科，個條友話唔關佢公司事，仲叫我不如換過張lan卡．．．．唔係呀！咁麻煩！最衰都係個window update，部腦冇啦啦自己走去update個window，我又唔想”lai”野，咪粗暴對待部腦（係咁拔掉插頭）．．．之後就上唔到網啦！都係衰衝動．．．．希望今晚有時間攪下佢啦！

聖誕禮物

我知依家諗定聖誕禮物係早左d，但是我要忙考試嘛，諗定都差唔多啦！我睇中左任天堂個部新的遊戲機Wii呀！去佢網頁睇下，嘩．．．好正呀！好多遊戲都好簡單，最適合我依種白痴玩．我只係睇下d人試玩的情景已經好興奮，諗下部咁型的遊戲機放係我部電視旁．．．真係諗下都笑出黎．第一時間打電話俾阿gel，同佢講我已經決定左送依個遊戲機做佢的聖誕禮物，同話叫佢唔需要side心機諗送咩俾我，因為我已經幫佢想好．．．．就係送Wii出的game咪得囉．．．．．哈哈！

稅．．．一點都唔輕鬆

由於下月中去旅行，會在１月才返香港，相信返香港第一件要做的事就係交稅．今年需要交的稅額小左，係因為有得扣供樓的利息．．計計下發現原來供樓的利息支出都幾大，唔怪得銀行年年賺錢啦！因為有我依種傻人每月進貢被佢賺！稅就年年交，但是從政府得來的福利真係唔多覺有．．．現在我地大多睇私家醫生，即是大多醫管局提供的服務都冇用過，社會福利．．．又唔輪到我．．．仲話要我地俾銷售稅，咁咪即係欺壓我地依種蟻民．今日睇報紙仲話五天工作週擴展至其他政府服務，有冇攪錯呀！政府五天提供服務即係叫我地唔好用．．．我地星期一至五的返工時間長過政府咁多，通常都係用星期六處理個d咩運輸處，ｘｘ處的野，依家咁．．唔通請假咩．．．．

藝術天分

朋友的小孩去學繪畫，問我有什麼好介紹．．．．．哈哈，佢真是問錯了人，我想我是朋友中最沒有藝術天分的人．自小，已經深深感受到我在這方面完全唔得．小學時，差不多所有勞作都係靠我老豆幫我攪掂，偶然一次老豆唔得閒幫我，我就頭都大埋，因為我畫咩唔似咩，相信老師一定知我係咩料子．好在中學唔需要再上art堂，唔係都唔知點死．由細都大都唔明，我阿妹都唔係咁，明明同一個阿爸阿媽，依方面差咁遠．細個睇到五線譜上的豆豉會頭暈，覺得個d豆豉係我頭上飛來飛去，一見到就走夾唔透！

風高浪急

近來香港與美國股市係咁升，聽見身旁的親朋好友個個都話賺錢，非常開心的樣子．我再看看自己的投資，好似大都原地踏步，點萛好？全都是我用作退休的，即係仲有排啦，距離我要快點退休的時間又拉長左．問題出在那裡？係我選股的問題定係我黑仔？中國的銀行保險股升左咁多，是否風高浪急之時？等我睇下可以做點什麼先．．．．

冇咩時間．．．

仲有一個月就考試，兩份paper，睇見個幾本好似黃頁咁厚的notes真是想死．讀書對於懶散的我係一個大挑戰，我滿以為大學畢業可以唔全唔需要再對住本書，但是在香港依個咁”顛”的地方，唔考試即是宣佈我即時死亡．．．．．所以要考試俾老細知我都仲存在架，加人工記住仲有我呀！日日都要返工，放工返黎已經好累，唔知點先可以讀得入腦．．．．

戰戰兢兢

昨日考獲車牌的阿gel,今日就懶醒咁要試下係路面證明佢的掂。我坐係佢身旁,講真?,我同佢一樣戰戰兢兢。驚佢唔小心撞到人地架車我冇錢陪,又驚佢被交通警抄牌,因為佢個牌要七日後先正式出,唔知依家可唔可以正式開車。好彩,佢開車都ok喎,去美國時唔駛我一個?哂,有人幫我手。正呀!

阿gel的大日子

這幾天阿gel的壓力非常大，一來佢公司少左條'靚'，多野做到死，二來今日係佢考車的大日子．佢學車都個多月，見佢?車時好緊張，我只識叫佢放鬆點，講下無聊野引開佢的注意力，但是我知冇咩用，因為佢依幾晚都緊張到睡不著，而我就每晚都仍睡至昏迷境界．唔知佢考成點．．．．．如果唔得．．．．都係等佢打電話黎通知先萛，依家諗咁多都冇用！

超強藥力

病到傻下傻下，醫生唔知開左咩藥俾我，食到我個人溫溫鄧鄧咁，坐係公司對住個電腦發呆．藥力超強，令我頭腦完全唔清醒，平時我都已經成日發夢，病左個幾日就好似每日都係度遊雲咁！每日由屋企飄返公司，又由公司飄返屋企．食哂所有藥後，人終於清醒過來．．．下次有病，都要再睇依個醫生，食完佢d藥好快入睡！

化妝

每朝返工都是不太清醒下撘巴士，今日係巴士站等巴士之際，迎面有個如女鬼的人向我的方向走過黎，嘩！個一刻成個心”離一離”，佢塊面兩邊化妝化到紅一紅，好似紙札公仔咁，如果夜晚見到都真是幾驚．我知化妝係禮貌的行為，有公司會要求員工返工一定要化妝，但都唔需要咁重手呀！唔知各位女士會唔會每日都化妝？各位男士又會否要求女伴化妝？我覺得唔化妝比較清新，但是看雜誌見到各大小女明星唔化妝個樣真是差好遠，有些好像兩個人咁，不得不承認化妝品的化腐朽為神奇．．．．

毆到死...

我病了，成個人輕飄飄咁．昨日返工已經好頭痛，返到屋企仲不停毆，最後被阿媽”鵝”到要去睇醫生，都係個d感親．食左藥，手軟?斬咁，都係要返工．．．我係唔會為左病而唔返工，我覺得返工的動力係可以令我快點好！

好瘀

每星期都會上網訂場打羽毛球，本想訂今個星期日早上，但係發現滿哂，唯有退而求其次訂晚上．今日我們還為了打波而早早食飯．當我們滿心歡喜拿哂球拍去打波，去到發現我地個場俾人用左？？？有冇攪錯，bbj當然即時問點解，再睇清楚d，原來係我book錯場．．．．．．．．我訂左早上七點而唔係晚上七點．．．．好瘀呀！阿gel仲不停咁瘀我，佢最串的就係同個管理員講：“好熱呀！打波打到成身汗！”　＄％?＆＃＄％　激死我啦！！！！！

濕地公園

小朋友好想去濕地公園睇貝貝（個隻走失左的鱷魚），星期六我地浩浩蕩蕩四個大人陪住兩個小朋友山長水遠去左位於天水圍旁的濕地公園．公園面積好大，好有教育意義．今年才開幕，所有設施都好新，平日的早上遊覽會比較好，因為少點自由行，清靜一點，可以真正感受個種大自然的感覺．而且冇咁?，觀鳥都舒服點．阿gel話依個萛係政府好有heart的貢獻，但是我提佢依個公園佢同我都有份起架．．．我地每年都要交稅呀！提起交稅，就黎一月又要交啦．．．．唔好俾我再見到綠色信封！！！！！


















佢地兩個好似好醒咁呀！

康奄

阿gel話依間野係日本都算係ok架，係香港的拉麵店來說，係質素最好，但是與日本相比都是差了點。選擇不是很多，麵的粗幼、油、濃度、辣味的分量都有得選擇。其實對我來說，味道已經很好，感覺上係第一碗係香港食到真有日本風味的拉麵。

日本酒店

這幾日不停搵東京酒店,昨日被阿gel係Yahoo Japan搵到一間係池袋今年新開的酒店。間酒店只是在JR站出口旁,超級方便,起碼冇香港人最愛往的新宿太子咁遠,價錢同新宿太子差不多,大石仲未覆價錢,睇黎要自己上網book。日本真是很怕外族入侵,佢地的綱頁好麻煩,只是俾有曰本地址的人註冊,依樣野難唔倒我,我都係求其寫左香港地址,不過揀左北海道做縣市,有點九唔搭八,係咁先得。最衰的是淨係填名都有分漢字、日文字、同埋最麻煩的半角字輸入,都唔知咩黎,最終搵左個係日本公司做野的朋友問,我再用日文輸入法...攪掂左!

鬼

睇完hana的post，記起以前中學在英國讀書，住在一間有百多年的宿舍，宿舍用木地板，即係行路會"it""it"聲個種。地牢係比我地放行李?，由於冇暖氣又冇人氣，感覺上又冷又濕，都幾陰森恐怖。而且中學生又好鍾意圍埋講鬼故，又話百幾年前d細路係度點死，講到似層層咁。但是我總是想太多，我諗如果有鬼,咁佢地會以咩形象出現? 好似外國人咁、似吸血彊屍、似閃靈裡的孖女、似中國面發青光的鬼定係似個d一見發財鬼。想得太多，次次諗完都已經行完個d驚既地方，所以俾錢去鬼屋唔係太值，因為冇時間驚。

咭數

有一個識了七至八年的朋友,前幾年都只是點頭之交,是這幾年才變成真是講到野的朋友。幾年前得知,原來佢係時下的年青人,即係爭人周身咭數,問佢為咩,都係因為虛榮心,敵不住各名牌的誘惑,成為各大咭公司的奴隸。當時已經叫佢快點想辦法攪掂,如果越加越多,最後就只可以破產。但係依條友只是當耳邊風,咭數越加越多,佢話因為唔開心去買野令自己好過點,而開心時更加要買野獎勵自己。條友真係痴線,欠銀行幾十萬咭數唔知佢可以點還。最衰的是佢份工唔可以破產,冇誠信喎! 最近佢終於的起心肝去搵UA,但是UA都幫唔到佢。我真是唔明點解可以咁癲,而且個d息成廿多里,真係任人"湯"。我係一定要個袋有錢的人,絕對唔可以用哂d錢,今日唔知聽日事,萬一被人抄左都仲可以生活丫!

大旅行

一年一度的大旅行定在十二月中,今次這個美日之旅各樣都差不多安排好,現在只差東京的酒店未訂。我已經寄了電郵去冬冬提議的website,希望可以?到一間平d的酒店啦! 原來仲有一個月就係,我仲要是大除夕個幾曰,酒店一定貴啦!聽聞一月一日連續幾日都係日本的假期,唔知各大商舖會唔會休息,如果係阿gel一定好唔高興。
依家計下計下,成個美日之旅都幾貴。香港SF東京來回機票,SF去florida的package,去滑雪的費用,仲有去東京的住宿,仲未計買野同食物交通費,今次真是大出血。

Donut

阿gel有日好認真咁同我講,你肥左好多,為了健康著想,要認真減肥。佢講完一陣,又再同我講:"喂! Krispy Kreme Doughnuts有halloween的donut賣,好得意架,我地去食丫!" 剛剛先叫我減肥,咁即係點呀?
咁我當然不負佢所望啦!食番夠本!

這個donut女郎在派傳單

Spider

我同阿gel都係怕昆蟲的人,而我係超級驚小強,係街見到會兜路走,最怕係識飛的小強。依樣野應該遺傳自我老豆,佢同我都係怕小強的,所以屋企主宰生殺大權的就是皇太后一我阿媽。依家自己住比較煩,因為一定要自己面對,所以我地盡可能將屋企保持有咁乾淨得咁乾淨。昨日安裝冷氣機,竟然走了一隻大蜘蛛出黎,係害怕的心情下一定要殺死佢,唔係佢死就我亡。係我採取敵不動我不動的策略時,阿gel懶醒咁推開我話"等我黎".....點知此時的蜘蛛已經不知所?。我用嚴厲的眼神望住阿gel...#$%&※$ 咁我地咪要與蜘蛛同眠!頂!!
好在今朝被我發現佢形跡,了斷左佢的餘生。再見啦！唔係，應該係以後都唔再見！

油價

近日國際油價由高位滑落,75美元跌落60美元,睇報紙話美國人可以慳番好多油錢。唔知各位係美國生活的人有冇強烈的感覺d油真係平番?
真係唔知香港油價點解仲係咁貴,我成日都周圍?平油,成日聽到油公司話油價高要加價,但是油價由高位回落,點解仲唔減價,減價,減價,減價,堅決要求油公司減價...